Wikang Katutubo, Kalikasang may puso

Wikang Katutubo, Kalikasang may puso

Ni: Ayana Camille B. Sebastian



Wikang Katutubo, Kalikasang may puso

Kapwa mahalaga’t dapat pakaingatan

Ito’y nagbigay sa atin ng buhay at pagkakakilanlan

At nagkintal ng sariling ganda sa ating mga puso



Ang Inang Wika ay siyang inang may katha

Ng komunikasyon at pagkakaunawaan

Nang diwa’y maipahayag ng may kalayaan

Salamat Inang Wika sa iyong pagpapala

Ngunit sa paglipas ng matagal na panahon

Ang pagpapahalaga ay tila nawaglit

Pumasok ang wikang banyaga at ito ang kanyang naging kapalit

At ang wikang sa ati’y umampon ay tuluyang naitapon

Inang kalikasan, Inang mapagmahal

Nagbigay sa atin ng yaman at buhay

At sa kanya tayo’y dapat magbigay pugay

Salamat sa kalikasang bigay ng Maykapal

Sa yamang likas tayo ay pinagpala

Ngunit sa pag abuso at kapalaluan,

tao’y naninira ng walang pakundangan

At sa huli tao rin ang magdadala ng galit niya

Ibayong pag-iingat at pagmamahal

Ang tanging kapalit ng natamong pagpapala,

Ng dalawang inang sa ati’y kumalinga

Kaya naman sa tuwina’y ipagmalaki’t gamitin ng tama