Dakilang Pamana ng Poong Lumikha

Dakilang Pamana ng Poong Lumikha
Coreedel Mae P. Tongol

Wika at kalikasan
Sadyang pinagbuklod ng kapalaran
Dalawang magkaibang salita
Ngunit magkaugnay sa diwa.


Wika,pundasyon ng pagkakaunawaan
Kalikasan,tumutugon sa ating pangangailangan
Bawat isa'y malaki ang papel na ginagampanan
Kapwa mahalaga sa pag-unlad ng bayan.


Kaya marapat lang na ating ipagmalaki
Sariling wika saan man magawi
Kung ating baybayin ito'y sadyang maikli
Ngunit ito'y yamang dapat ipagbunyi.


Gayundin ang kalikasang ating namulatan
Sadyang kayganda't kaaya-ayang tignan
Mga tanawing likha ng Maykapal
Karikta'y tunay,wagas at banal.


Ating limiin mga kaibiga't kapatid
Wika at kalikasan ano ang sa ati'y hatid
Magandang tanawin,maayang paligid
At malinaw na mensaheng dagliang mabatid.


Mga biyayang natatangi at espesyal
Ating pagyamanin at ikarangal
Dakilang handog ng Poong Maykapal
Marapat na alayan ng wagas na pagmamahal.