Gising Juan Abuso!

Gising Juan Abuso!
Richard Amborgo

Juan Abuso ito ba ang iyong gusto?
Na ang bawat isa ay hindi magkasundo
Dahil ang sariling mong wika’y ipinagkanulo.
Hindi ba dapat pag ibig ang siyang ihandog mo
Nang makapagdala ng pagbabago.

Ito ba ang naisin mo Juan Abuso?
Na ang karagata’y magdilim at kagubata’y makalbo
Upang nasisirang kalikasan ang iyong matamo
Na noon ay kahali- halina na ipinagkaloob sa iyo
Ng mga itinatangi nating dakilang ninuno.

Ito’y kalatas ng wikang kinagisnan
At panaghoy ni Inang Kalikasan.
Bagama’t itinuro ng sintang paaralan
Kalinga’t pagmamahal talagang kailangan
Nguni’t sa di kinalaunan sila’y pinabayaan.

Gising na Juan Abuso!
Halina’t buksan ang ating mga puso
Na ang Poong Maykapal ang Siyang nagregalo
Pagmamahal na matagal mong pinagmaramot at itinago
Sa sariling wika at Inang Kalikasan na nagsusumamo.