FILIPINO, WIKA NG SALIKSIK

FILIPINO, WIKA NG SALIKSIK

Jennifor L. Aguilar

Nagpupumilit, naggugumiit, nagsusumiksik

Pinipilit, ginigiit, sinisiksik

Wikang Filipino’y ihanay sa mga wika ng daigdig

Makamit ang antas maigng wika  ng saliksik

Hindi mararating ni hindi maihahambing

Maging higanteng wika’y suntok lamang sa dilim

Hangga’t walang bait, buti at  panalanging taimtim

Na gamitin sa saliksik ang wika nating angkin

Sa mga paaralan, hindi siya pinapansin

Mga guro’t administrador, napakababa kung tinuturing

Sa matatalinong usapin, debate’t mga sulatin

Hindi maipilit na gamitin lang man din

Sa larang-medikal, naririnig ba natin?

Mga terminolohiya ng sakit at gamot na generik

Hindi nga mabigkas ng pasyenteng namimilipit

Kasama na niyang namatay hanggang sa mailibing

Maging sa hudikatura, may puwang bang nakalaan?

Pobreng Pilipinong nasasakdal, sa Ingles pinagtatalunan

Nakulong na’t lahat, nabulok sa bilangguan

Hindi man lamang nakapagtanggol sa wika niyang alam.

Hindi magtatagumpay at walang mararating

Wikang mahal natin kung ganito itinuturing

Tuluyan siyang masasadlak, mananatiling alipin

Mabibilanggo’t magkakasakit hanggang tayo’y lisanin

Simulang pahalagahan, gamitin nang gamitin

Talastasan sa tahanan at komunidad natin

Sa simbahan, paaralan, ospital o hukuman

Senado at Kongreso, hanggang sa Malakanyang

Itakda itong wika ng aklat at kasaysayan

Agham, Matematika at diskursong pangkaunlaran

Itanim ito sa dila ng mga kabataan

Hanggang sa tumubo’t magbunga sa henerasyong dadaan

Pagka’t Filipino’y wikang mabalasik

Kung magpupumilit ay may makakamit

Kung maggugumiit, tuluyang makasasapit

Kung magsusumiksik, magiging wika ng saliksik

JENNIFOR L. AGUILAR, Ed.D

Chairperson

Master of Arts in Filipino Program

POLYTECHNIC UNIVERSITY OF THE PHILIPPINES

COLLEGE OF EDUCATION

2/F North Wing Main Building

A. Mabini Campus, Anonas St., Sta. Mesa

Manila, Philippines 1016