Pandaigdigang Kongreso sa mga Pag-Aaral Hinggil sa Filipinas sa Wikang Filipino

Buwan ng Wikang Pambansa 2017

Pandaigdigang Kongreso sa mga Pag-Aaral Hinggil  sa Filipinas sa Wikang Filipino

2-4 Agosto 2017 Pambansang Museo Lungsod Maynila

Pagbabalik, Pagbabantayog sa Filipino

Panahon nang ibantayog ang Filipino bilang wika ng karunungan at gamitin ito sa iba’t ibang disiplina o larang, lalo na sa mga pag-aaral hinggil sa ating bansa upang mapalaganap ang diskurso ukol sa pagiging Filipino at para sa sambayanang Filipino.

Layunin ng Kongreso na:

makabuo ng isang bagong pagtanaw sa Filipino
matipon ang mga iskolar at mga pag-aaral hinggil sa Filipino at mahimok na gamitin ang wikang Filipino sa kanilang saliksik
malikom ang mga pinakaprogresibo at siyentipikong pagsusuri sa wika, panitikan, kasaysayan, sining, at kultura ng Filipinas
mabalangkas ang isang pangmatagalang estratehiya tungo sa edukasyon hinggil sa Filipinas na gumagamit sa wikang Filipino
Inaanyayahan ang mga kasapi ng Philippine Studies Association at mga kaugnay na kapisanan o organisasyon, mga iskolar sa lahat ng disiplina, sa loob at labas ng bansa, na magsumite ng panukala.


Para sa iba pang katanungan, maaaring mag-text sa 09983703023

Iba pang detalyeMakikita sa pandaigdigangkongreso.wordpress.com at www.fb.com/PandaigdigangKongreso ang mga detalye hinggil sa rehistrasyon at iba pang impormasyon (talaan ng mga otel, pagpunta sa pagdarausan ng kongreso, atbp).

Ulirang Guro, tumatanggap na ng nominasyon!

Buwan ng Wikang Pambansa 2017

Filipino: Wikang Mapagbago

Ulirang Guro, tumatanggap na ng nominasyon!

retrato mula sa website ng kwf

Tuntunin sa Ulirang Guro sa Filipino 2017

1. Bukás ang timpalak sa mga guro sa Filipino at mga guro na nagtuturo ng ibang disiplina gamit ang wikang Filipino, maliban sa mga kawani ng KWF at mga direktor ng Sentro ng Wika at Kultura (SWK), at kanilang mga kaanak hanggang ikalawang digri (degree).

2. Ang mga nominado ay kinakailangang magtaglay ng sumusunod na katangian:

a. May hawak na kaukulang lisensiya (LET para sa nasa antas sekundarya at elementarya), full-time at may permanenteng istatus.
b. Nakapaglingkod nang tatlo (3) o higit pang taon bílang guro ng Filipino o mga kaugnay na disiplina na ang gamit ay Filipino bílang wikang panturo at kasalukuyang nagtuturo sa anumang antas ng edukasyon at may antas ng kahusayan (performance rating) na hindi bababa sa Very Satisfactory sa buong panahon ng paglilingkod.
c. May makabuluhang ambag sa mga saliksik pangwika at pangkultura ng rehiyon.
d. Nakapag-ambag sa pagpapalaganap at promosyon ng Wikang Filipino at/o mga wika at kultura sa larangan ng pagtuturo sa kanilang komunidad sa pamamagitan ng publikasyon, seminar, pagsasanay, palihan, at iba pang katulad na gawain.
e. Nanguna sa pagpapahalaga sa pamánang pangwika at pangkultura ng Filipinas kaagapay ng pagtataguyod at pagpapaunlad sa wikang Filipino.
f. Nakatanggap ng parangal at/o iba pang gawad kaugnay sa kaniyang propesyon (opsiyonal).

3. Maaaring magpása ang paaralan ng higit sa isang nominasyon.

4. Ang bawat nominado ay kailangang magsumite ng mga sumusunod na dokumento:

a. Pomularyo para sa nominasyon;
b. Komprehensibong Curriculum Vitae
c. Rekomendasyon mula sa immediate superior ng kaniyang paaralan na naglalahad ng sumusunod:

c.1 Katunayan ng kagalingan bílang guro sa Filipino o guro na gumagamit ng Filipino sa kaniyang pagtutro na may makabansa at makataong kamalayan.
c.2 Katunayan ng No Pending Case

d. Folio ng mga katibayan ng pagkilala, gawad, publikasyon, at mga naisagawang seminar, palihan, at mga pananaliksik at proyektong may kaugnayan sa wika at kultura.
e. Kung nagtuturo ng ibang disiplina, ilakip ang mga patunay na nakapagtuturo gamit ang Filipino. Hal. modyul, banghay-aralin, silabus, pagsusulit, at iba pang kagamitang pampagtuturo nasusulat sa wikang Filipino

Kung sa tanggapan ng KWF isusumite ang lahok, kailangang magsumite ng hard copy file ng mga dokumento at soft copy file na nasa isang (1) CD. Ipadala ang lahok sa:

Lupon ng Ulirang Guro sa Filipino 2017
Komisyon sa Wikang Filipino
Gusaling Watson, 1610 Kalye J.P. Laurel
1005 San Miguel, Maynila

Kung sa tanggapan ng Sentro ng Wika at Kultura (SWK) ipapadala ang lahok, kailangang magsumite ng dalawang (2) hard copy file at soft copy file na nasa isang CD. Maiiwan ang isang kopya ng hard copy file sa tanggapan ng SWK.

5. Isasama sa mga nominado ang mga nominasyon noong nakaraang taon (2016) na nag-update ng kanilang mga dokumento. Ngunit kung walang idadagdag sa mga dokumentong naipasa noong nakaraang taon, hindi na ito isasama.

6. Hinihikayat ring muling magsumite ng mga lahok ang mga sumali noong taong 2014 at 2015 sa gawad na ito maliban sa mga nanalo na.

7. Ang huling araw ng pagsusumite ng mga lahok sa tanggapan ng KWF ay sa 14 Hunyo 2017. Maaari ding ipadala ang mga nominasyon sa tanggapan ng Sentro ng Wika at Kultura (SWK) na nasa probinsiya/rehiyong kinabibilangan ng nominado. Hindi na mauurong ang araw ng pagsusumite.

8. Makatatanggap ng medalya at katibayan ng pagkilala ang mga mapipiling Ulirang Guro sa Filipino.
9. Ang pasiya ng inampalan ay pinal at hindi na mababago. Lahat ng isinumiteng lahok, nanalo man o natalo, ay hindi na ibabalik ng KWF.

10. Para sa karagdagang tanong at detalye, mangyaring makipag-ugnayan sa:

Komisyon sa Wikang Filipino
Gusaling Watson, 1610 Kalye J.P. Laurel
San Miguel, Maynila
Telepono: (02) 243-9855
Email: komfil@kwf.gov.ph, ssgkwf@gmail.com
Website: www.kwf.gov.ph

Sumali sa Gawad KWF sa Sanaysay 2017!

Buwan ng Wikang Pambasa 2017

Sumali sa Gawad KWF sa Sanaysay 2017!

Inaanyayahan ang lahat na lumahok sa Gawad KWF sa Sanaysay! Bukod sa titulong Mananaysay ng Taon 2017, may naghihintay na PHP30,000.00 sa magwawagi ng unang gantimpala sa taunang timpalak ng KWF.

Tuntunin

Ang Gawad KWF sa Sanaysay ay bukás sa lahat maliban sa mga kawani ng KWF at kanilang kaanak.

Ang paksa ng sanaysay ay maaaring pagtalakay ng konsepto o resulta ng saliksik sa larang na agham-pangkalikasan, agham panlipunan, matematika, o mga katulad nito.

Kailangang nasusulat sa Filipino ang lahok, orihinal, hindi pa nailalathala, at hindi rin salin mula sa ibang wika. Marapat na hindi ito magkukulang sa 15 pahina at hindi rin sosobra sa 30.

Bilang saliksik, kailangang sumusunod ang paraan ng pagsulat nito sa mga tuntuning nakasaad sa KWF Manwal sa Masinop na Pagsulat.

Ang lahok ay kailangang may apat (4) na kopyang makinilyado o kompiyuterisado (Font-12, Arial), may dobleng espasyo, at may isang pulgadang palugit sa bawat gilid na nakaimprenta sa short bond paper na may laking 8 ½ x 11 pulgada.  Ang soft copy ng lahok ay kailangang ilagay sa isang compact disc (CD).

Kinakailangang nagtataglay lamang ng sagisag-panulat (pen name) ang dokumento, soft copy man o nakaimprentang kopya.

Kasama ng ipapasang lahok ay isang isang selyadong No. 10 envelope na naglalaman ng hiwalay na  pormularyo sa paglahok para sa buong detalye ng may-akda, dalawang retrato (2×2) ng kalahok, at maikling biodata.

Ipadala ang lahat ng kahingian sa:
Gawad KWF sa Sanaysay 2017
Komisyon sa Wikang Filipino
2F Watson Bldg., 1610 JP Laurel St.,
San Miguel, Manila 1005

Anumang pasiya ng Lupon ng Inampalan ay pinal at hindi na maipaghahabol. Lahat ng lahok, nanalo man o  natalo, ay hindi na ibabalik sa mga kalahok at angkin ng KWF ang karapatang mailathala ang mga nagwaging lahok nang walang royalty sa mga may-akda.

 Ang gantimpala ay ang sumusunod: una, P30,000.00 at karangalang maging “Mananaysay ng Taon”; pangalawa, P20,000.00; pangatlo, P15,000.00.

Hindi patatawarin ang sino mang mahuhuli nagplahiyo. Kakanselahin ng KWF ang ipinagwaging lahok at hindi na muling makasasali pa sa alinmang timpalak ng KWF.

Hanggang 07 Hulyo 2017, 5:00 nh ang pagtanggap ng mga lahok. Hindi tatanggapin ang mga lahok na ipinasa sa email.

Para sa mga tanong, tumawag sa (02) 736- 2519 para sa karagdagang impormasyon.